အလှူငွေများပေးအပ်လှူဒါန်းခဲ့ပါပြီ …

မလေးရှားရောက် မြန်မာနိုင်ငံသားများရဲ့ လက်ရှိခံစားနေရတဲ့ စိတ်သောကတွေ ၊ တိုက်ခိုက်ခံဒဏ်ရာရ မြန်မာနိုင်ငံသားများအတွက် လိုအပ်ချက်တွေ ၊ သေဆုံးသွားသူများအတွက် ဆောင်ရွက်ရမည့် လိုအပ်ချက်တွေ အတွက် အမိမြေမှ သားကောင်းများရဲ့ ကူညီမှု့များဖြစ်သည့် အမေရိကန်ဒေါ်လာ ၇၀၀၀၀ (ခုနှစ်သောင်း) သည် ယခု အမှန်တကယ် လိုအပ်နေသော နေရာသို့ ရောက်ရှိခဲ့ပြီဖြစ်သည် ။
မြန်မာနိုင်ငံဘောလုံးအဖွဲ့ ဥက္ကဌ (MAX MYANMAR) ဦးဇော်ဇော်၏ ဧရာဝတီဖောင်ဒေးရှင်း လို့အမည်ရတဲ့ အဖွဲ့ရဲ့ ကိုယ်စားလှယ်များဟာ မနေ့က ( ၁၂.၆.၂၀၁၃ ) မှာ မလေးရှားနိုင်ငံသို့ ရောက်ရှိလာခဲ့ပြီး ချက်ချင်း ပင် ကပုန်းနာရေးကူညီမှု့အသင်း သို့ရောက်ရှိကာ KBZ ဘဏ် ဥက္ကဌ ဦးအောင်ကိုဝင်းရဲ့ အလှူငွေ အမေရိကန်ဒေါ်လာ 50000 US$ ၊ မြန်မာနိုင်ငံဘောလုံးအဖွဲ့ချုပ်ဥက္ကဌ ဦးဇော်ဇော်၏ အလှူငွေ အမေရိကန်ဒေါ်လာ 20000 US$ ၊ တေးဆို စံလင်း အလှူငွေ ကျပ် တစ်သိန်းခွဲ တို့အား ပေးအပ်လှူဒါန်းသွားခဲ့ပါတယ် ။
အလှူရှင်များရဲ့ ကိုယ့်နိုင်ငံသားများကို ပြန်လည်စောင့်ရှောက်မှု့အတွက် ကျွန်တော်တို့ မလေးရှားရောက် မြန်မာနိုင်ငံသား အားလုံး အားလုံးက ကျေးဇူး အထူးတင်ရှိသလို လိုအပ်ချိန်မှာ အားပေးခဲ့တဲ့အတွက် ကျွန်တော်တို့ စိတ်ထဲ နှလုံးသားထဲက လှိုက်လှုက်လဲလဲ ပီတိဖြစ်ကြရပါတယ် ။
ထို့မျှမက စိတ်စိုးရိမ်သောကရောက်နေကြရတဲ့ ကျွန်တော်တို့ မြန်မာနိုင်ငံသားများ အမိမြေပြန်ဖို့ ဦးဇော်ဇော်၏ ဧရာဝတီ ဖောင်ဒေးရှင်းမှ အမေရိကန်ဒေါ်လာ သိန်းကျော်တန်ဖိုးရှိ လေယဉ်လက်မှတ် အစောင် ၁၀၀၀ တိတိကို အဆင်သင့် စီစဉ်ပေးထားပြန်တော့ ကျွန်တော်တို့ တစ်ကယ် လိုအပ်နေတဲ့ သူများအတွက် မျှော်လင့်ချက် တစ်ခု ဖြစ်ခဲ့ရပြန်ပါတယ် ။
နိုင်ငံတော်ရဲ့ တာဝန်ရှိသူများရဲ့ မလေးရှားအစိုးရ ညှိနိုင်း နေတယ်လို့ကြားရပြီး ကျွန်တော်တို့ အပေါ်ထိရောက်တဲ့ ကာကွယ်မှုနဲ့ ဖမ်းဆီးခံမြန်မာနိုင်ငံသားများကို အမိမြေပြန်ပို့ပေးဖို့ ၊ လက်ရှိ ပြန်လိုသူများအတွက် မလေးရှား အင်မီဂရေးရှင်းမှာ ၃ လတိတိ စောင့်ဆိုင်းရမယ့် Special Pass အတွက် ပိုမို မြန်ဆန်စွာ မလေးရှားမှ ထွက်ခွာဖို့ကို မြန်မာနိုင်ငံသားများစွာက မျှော်လင့်နေတဲ့အကြောင်း ကျွန်တော်တို့ ထပ်ဖြည့်စွက် အကူညီတောင်းခံပါတယ် ။
ယနေ့ မလေးရှားမှတရားဝင် ထွက်ခွာခွင့်ရအောင် Immigratoin (Putra Jaya) မှာ သွားရောက် လျှောက်ထားတဲ့ အခါ လာမည့် Spetember လ လယ်ကို ပြန်လည်ချိန်းဆိုထားတာကို တွေ့ကြမှာပါ ၊ အကူညီပေးမယ့် အချိန်မှာ အမှန်တကယ်ပြန်ဖို့ ကျွန်တောတို့ မဖြစ်နိုင်ကြပါဘူး ။ ကူညီသူတွေရှိတဲ့ အချိန် စုဝေပြန်နိုင်ကြဖို့ ကျွန်တောတို့ မျှော်လင့်နေကြပါတယ် ။
ဒီနေ့ ကျွန်တော်တို့ မြန်မာလူမျိုးတွေရဲ့ သမိုင်းတစ်လျှောက် မမျှော်လင့်ခဲ့တဲ့ အဖြစ်အပျက်တွေဖြစ်လာခဲ့ပြီး နိုင်ငံတကာရောက်နေတဲ့ မြန်မာလုပ်သားများ ရဲ့ ဖမ်းဆီးခံ ၊ ခြိမ်းခြောက်ခံ အခြေအနေတွေနဲ့ သောကများစွာ ဖြင့် နေထိုင်နေနေကြတဲ့ အချိန် မှာ ယခုလို ဆောင်ရွက်ကူညီပေးမှုကကျွန်တော်တို့ အတွက် အားဆေးတစ်ခွက်ပါ ။
အခက်ခဲကြားထဲက လိုအပ်တဲ့ အချိန်မှာ ကူညီပေးသွားတဲ့ အင်မတန်ရိုးရှင်းပြီး ပကာသနမပါတဲ့ အလှူတစ်ခုအတွက် ကျွန်တော်တို့ မလေးရှားရောက် မြန်မာအားလုံးက စုပေါင်း သာဓုခေါ်နေကြပါတယ်။ ကျေးဇူးတင်နေကြပါတယ် ။ ကျွန်တော်တို့ အိမ်ပြန်လာခဲ့ကြပါမယ် ………

မလေးရှားရောက်မြန်မာများ …….

မလေးရှားရောက်မြန်မာများ