မြစ်ကြောင်းအတွင်း သောင်ထွန်း၍ မြစ်ကြောင်း ပြောင်းလဲစီးဆင်းမှုကြောင့် ရေတိုက်စားပြီး ကမ်းပါးပြိုကျမှုများ မင်းဘူး- စကုမြို့ နယ်ရှိ နိဗ္ဗာန်ကျွန်းကျေးရွာ တွင် ဇွန်လဆန်းပိုင်းက စတင်၍ ဆက်တိုက် ဖြစ်ပေါ်နေခြင်းကြောင့် ရွာလုံးကျွတ် ပြောင်းရွှေ့ရမည့် အခြေအနေသို့ ရောက်ရှိ နေကြောင်း ဒေသခံများ၏ ပြောကြားချက်အရ သိရှိရသည်။
နှစ်စဉ် ဧရာဝတီမြစ်ရေ တိုက်စားပြီး ကမ်းပါးပြိုကျမှုကြောင့် အဆိုပါ နိဗ္ဗာန်ကျွန်း ကျေးရွာသည် ပြီးခဲ့သည့် လေးနှစ်အတွင်း ကမ်းပါးမှ ၂ မိုင်ခန့် နောက်ဆုတ်သွားရပြီ ဖြစ်ကြောင်း၊ ယခုရက်ပိုင်း အတွင်း၌လည်း မြစ်ရေတက်မှုကြောင့် ကမ်းပါးပြိုမှု နေ့စဉ် ဖြစ်ပွားနေရာ ဒေသခံများမှာ အိမ်များ ရွှေ့ပြောင်းနေရကြောင်း ပါရမီသွေးလှူရှင်များ အဖွဲ့ခေါင်းဆောင် တစ်ဦးဖြစ်သူ ဦးအောင်လွင်က ပြောကြားသည်။
မြစ်ကမ်းပါး ပြိုကျနေမှုကြောင့် အိမ်ခြေ ၂၀ ခန့်ပြောင်းရွှေ့ထားပြီး ဖြစ်သော်လည်း ထပ်မံ၍ မြေပြိုနေခြင်းကြောင့် ရွာတစ်ရွာလုံး ရွှေ့ပြောင်းရမည်ဖြစ်ကြောင်း၊ ယင်းကမ်းပြိုမှု အတွက် မြို့နယ်အထွေထွေ အုပ်ချုပ်ရေး တာဝန်ရှိသူများနှင့် မြန်မာနိုင်ငံ ကြက်ခြေနီအသင်း (မကွေး) တို့က လာရောက်စစ်ဆေး ခဲ့ကြောင်း ၄င်းက ဆိုသည်။
နှစ်စဉ် ကမ်းပါးပြိုကျမှု ဖြစ်ပေါ်နေခြင်း ဖြစ်သော်လည်း သက်ဆိုင်ရာ အာဏာပိုင် များမှာ ကမ်းပါးပြိုကျခြင်း မရှိအောင် တစ်စုံတစ်ရာ ပြုပြင်ဆောင်ရွက်ပေးခြင်း မရှိသည့် အပြင်ဒေသခံများ အတွက် နေရာပြန်လည် ချထားပေးနိုင်ခြင်းလည်း မရှိကြောင်း မင်းဘူးမြို့နယ်တွင် နေထိုင်သူ တစ်ဦးက သုံးသပ်သည်။
မိုးရာသီကာလ၌ မုန်းချောင်းရေ တိုက်စား၍ ပွင့်ဖြူမြို့နယ်ရှိ ရွာသာညွှန့် ကျေးရွာနှင့် မင်းဘူး-စကုမြို့နယ်ဘက် အပိုင်းပါ ကျောင်းကုန်းကျေးရွာ တို့တွင်လည်း ကမ်းပါးမြေပြိုနေသည့် အတွက် ဒေသခံများမှာ နေအိမ်များ ပြောင်းရွှေ့ နေထိုင်နေရကြောင်း ရွာသာညွှန့် ကျေးရွာတွင် နေထိုင်လျက်ရှိသူ အမျိုးသမီးတစ်ဦး ကဆိုသည်။
"ကျွန်မတို့လယ် သုံးကွက်လောက် ပြိုတဲ့အထဲ ပါသွားတယ်" ဟု ၄င်းက ဆိုသည်။
မြစ်ကြောင်း ပြောင်းလဲလာပြီး ကမ်းပြို စေသည့် အကြောင်းအရာမှာ မြစ်၊ချောင်း များအတွင်း သဲ၊ ကျောက်စရစ်ခဲများ အလွန်အကျွံ ထုတ်ယူခြင်းနှင့် ဒီရေတော များမရှိခြင်း စသည့်အချက်များကြောင့် လည်းဖြစ်ကြောင်း သဘာဝပတ်ဝန်းကျင် ထိန်းသိမ်းရေး လုပ်ဆောင်သူများက မှတ်ချက်ပြု ပြောကြားသည်။
No comments:
Post a Comment